Personal site

DOWNTOWN

baiateo — Mon, 25 Apr 2011 10:49:23 GMT

ძალიან დიდი ხანია არაფერი აღარ დამიწერია, უნდა ვაღიარო პერიოდულად მავიწყდებოდა კიდეც ამ საიტის არსებობა, თუმცა იმდენი რამ მოხდა, რომ მაინც ვერ ვითმენ რომ არ დავწერო რაღაც-რაღაცეები:))

პირველი რაც მახსენდება დაუნთაუნია - ყავის რესტორანი:))

მართალია ვერ ვიტყვი ძალიან ხშირად დავდივართქო, რაც ალბათ ჩემს მეგობრებს უნდა დავაბრალო, რამდენჯერაც ვახსენებ უჰაერობა გვტანჯავსო მესმის:)) მაგრამ ჩემთვის მაინც ერთერთი საყვარელი ადგილია.

მდებარეობას რაც შეეხება საკმაოდ ადვილად მისაგნებია, მერიის გვერდით, ტაბიძის ქუჩაზეა. მანქანას რა თქმა უნდა ზედ ცხვირწინ ვერ გააჩერებთ, ცოტა ფეხით გავლა მოგიწევთ, მაგრამ არც ისე დიდი მანძილია, რომ საწუწუნო იყოს.

მოკლედ ჩაუყვებით ქვაფენილიან ქუჩას და დაინახავთ დაუნთაუნს :))

ჩემი აზრით საკმაოდ გემოვნებით გაფორმებული ადგილია

სასიამოვნო მუსიკით, ყველანაირი სახეობის ყავით,

ცხელი ალკოჰოლური სასმელებით (ჩემი ფავორიტი ნაწილი მენიუში:)))

და უგემრიელესი სენდვიჩებით. რა თქმა უნდა სხვა რამეებიც გემრიელია, მაგრამ მე მაინც სენდვიჩების ფანი ვარ:)))

თუ იქვე ახლოს მუშაობთ და შესვენების პერიოდის სასიამოვნოდ გატარება გსურთ შეგიძლიათ ლანჩზეც ეწვიოთ დაუნთაუნს, 13 ლარი ღირს ლანჩ მენიუ, რომელიც შედგება სუპისაგან, სალათის და გამაგრილებელი სასმელისაგან

და ბოლოს Take away სერვისი, ვისაც დრო არ გაქვთ ან მარტო ჯდომა გეზარებათ შეიძლიათ წასაღებად გააკეთებინოთ ნებისმიერი სახეობის ყავა ან თუნდაც ალკოჰოლური სასმელი, რასაც ხშირად მივმართავ ხოლმე:)) ყველაზე მეტად მაინც გროგი მიყვარს, თუმცა აქვთ გლინტვეინიც და ირლანდიური ყავაც. ხო თუ გლინტვეინს აირჩევთ წითელი ჯობია თეთრს:))) მოკლედ აირჩევთ რაც მოგესურვებათ და ძალიან ყურადღებიანი ბარმენი 2 წუთში მოგიმზადებთ ყველაფერს

სასმელების გარდა ალბათ სენდვიჩების წაღებაც შეიძლება, თუმცა მე არ მიცდია არასოდეს. მომავალში აუცილებლად ვცდი და მოგახსენებთ რამდენ ხანში ამზადებენ წასაღებად სენდვიჩებს:))

მოკლედ დღეისათვის სულ ესაა. იმედი მაქვს მოგეწონებათ დაუნთაუნი, რომლის ერთადერთი ნაკლი ჩემი აზრით არის ის, რომ საიტი არ მუშაობს:))) თუმცა ამ ნაკლს აიტანს ადამიანი როგორმე

პიცერია ფანტასტიკო

baiateo — Mon, 07 Feb 2011 09:30:04 GMT

პიცერია ფანტასტიკოს ნაფარეულის ქუჩაზე ხშირად ვსტუმრობდი ხოლმე ერთ დროს. ამჯერად კი ეთოს რჩევას დავუჯერე და სუპერმარკეტ "კონტინენტალი"-ს გვერდით, ყაზბეგის გამზირზე #14-ში მდებარე რესტორნისკენ გავეშურეთ.

მიუხედავად იმისა, რომ ამ პიცერიის დიზაინი არანაირ გემოვნებაში არ ჯდება, მაინც ყოველთვის დიდი სიამოვნებით წავალ უუგემრიელესი პიცებისა და პასტების გამო.

ამჯერად აღმოჩენაც გავაკეთე. თურმე ცხელი შოკოლადიც ქონიათ, თან ზუსტად ისეთი მე რომ მიყვარს სქელი. ჩვენს კაფეებსა თუ ბარებში ცხელ შოკოლადს ძირითადად თხელს, კაკაოს მსგავსს აკეთებენ და ამიტომაც ძირითადად არ ვუკვეთავ ხოლმე. აი ფანტასტიკოში კი ნამდვილი ცხელი შოკოლადი იყო :))

აღარ დავიწყებ წერას თუ რა გემრიელი პიცა და პასტაა ამ რესტორანში. ამჯერად პიცა არ შეგვიკვეთია. მარამ შეკვეთიდან სულ რაღაც 10 წუთში ორი პასტა. ერთი ბოლონეზის და მეორე ოთხი ყველის სოუსით.

წინა კვირაში მე და ეთო პანეტერიაში ვიყავით. მართალია ისიც ძალიან მოგვწონს, მაგრამ ჩემი არჩევანი მაინც ფანტასტიკოა. როგორც სამზარეულოთი, ისე ადგილმდებარეობის მხრივაც. თუმცა აღსანიშნავია, რომ პანეტერიის ფასები ცოტათი უფრო დაბალია.

სულ ესაა რაც დღეს მინდოდა დამეწერა.

P.S. იმედია ამ კვირაში ახალ პიცერიას დავტესტავთ, და სურათების გადაღებასაც მოვახერხებ

ფანტასტიკო:

ყაზბეგის გამზ. 14 , ტელ: 72 89 08; (90) 72 89 08
ნაფარეულის ქ. 3ა , ტელ: 29 46 75

პანეტერია

baiateo — Tue, 01 Feb 2011 08:11:53 GMT

პანეტერია,

ჩემი და ეთოს ერთერთი უსაყვარლესი ადგილია, ამიტომაც გუშინ ბევრი არც გვიფიქრია და სამსახურის შემდეგ პირდაპირ ნუცუბიძის პლატოზე ამოვყავით თავი.

ერთადერთი მინუსი რაც ამ პიცერია-საკონდიტროსი არის მდებარეობა, ჟღენტის 3ა, ნუცუბიძის II მ/რ. თუმცა თუ მანქანით მოძრაობთ ეს პრობლემაც მოხსნილია. რაც ყველაზე მთავარია მანქანის მფლობელებისათვის - პარკინგის ადგილსაც ადვილად იპოვით პიცერიის გვერდით. სადაც არც ე.წ სტაიანშიკი შეგაწუხებთ და არც სიტი-პარკი :))

ამ სასიამოვნოდ გაფორმებულ ინტერიერში დავაგემოვნეთ უგემრიელესად მომზადებული პიცა
კაპრიჩოზა

და ასევე უგემრიელესი ნამცხვრები :)) განსაკუთრებით გემრიელი კი ჩემი ჟელეთი გაფორმებული ჩიზქეიკი იყო.

ჩვენი შეკვეთილი კაპრიჩოზა იმდენად გემრიელი აღმოჩნდა, რომ სახლისთვისაც მომინდა პიცის შეკვეთა და შეკვეთიდან სულ რაღაც 7 წუთში ხელში დიდი ყუთი მეჭირა სახლში წასაღებად გამზადებული, რომელშიც პიცა პროშუტო იდო :))

პიცერიიდან გამოსულები შეგიძლიათ მის გვერდით მდებარე პანეტერიის საცხობსაც ეწვიოთ და სახლისთვის პურ-ფუნთუშეული, პეჩენიები და სხვა ტკბილეული შეიძინოთ. მაგრამ გაითვალისწინეთ, რომ როგორც პიცერია ისე საცხობი მხოლოდ 10 საათამდე მუშაობს. რა თქმა უნდა მე და ეთო დიდად არ დავფიქრებულვართ ამ საკითხზე და იმიტომაც დავრჩით პეჩენიების გარეშე :))) თუმცა მე რა მიჭირდა ხელში სახლში წასაღები პიცა მეჭირა:)))

კიდევ ერთი სასარგებლო რაც გუშინდელმა საღამომ მოიტანა ახალი გზის დატესტვა იყო. მართალია ცოტაც და დავიკარგებოდით ნუცუბიძის პლატოს გაურკვეველ გზებზე, მაგრამ ბოლოს მაინც გაგვიმართლა და ახალ გზასაც დავადექით. სწორედ ამ გუშინდელი გამოცდილებიდან გირჩევთ რომ თუ ვაჟას ბოლოდან ან ნუცუბიძიდან დიღმისკენ აპირებთ წასვლას ნამდვილად ღირს ამ გზით წასვლა. საკმაოდ მალე, შუქნიშნებისა და საცობების გარეშე მიაღწევთ ვაშლიჯვარს, და თბილისის მშვენიერი ხედითაც დატკბებით, განსაკუთრებით თუ ღამე მოგიწიათ ამ გზაზე გავლა.

და ბოლოს, შეგიძლიათ ეწვიოთ პანეტერიის ვებ-გვერდს http://www.panetteria.ge/ და წინასწარ აარჩიოთ თქვენთვის სასურველი პიცა.

P.S. ნუცუბიძის პლატოს გარდა პანეტერიის მფლობელებს მეორე რესტორანი-პიცერიაც აქვთ წერეთლის პროსპექტზე (წერეთლის 77 ტელ: 478 475 879 79 48 48) თუმცა მე არასოდეს არ ვყოფილვარ და წარმოდგენა არ მაქვს ღირს თუ არა იქ წასვლა. მომავალში აუცილებლად ვეცდები წავიდე და შედეგებიც შეგატყობინოთ :))

Acid bar

baiateo — Fri, 21 Jan 2011 17:57:13 GMT

რამდენიმედღიანი ფიქრის შემდეგ რაიმე ახალი და საინტერესო ადგილი გვეპოვა კრახით დასრულდა. ვერაფერი რომ ვერ მოვიფიქრეთ ისევ ძველი ნაცნობი ეისიდ ბარი შეგვრჩა ხელში. რომელიც ან ჩვენ არ გვახსოვდა როგორი იყო ან საოცრად საშინელი ადგილი გამხდარა.

სამსახურიდან ცოტა გვიან გამოვედი მაგრამ ჩემი აზრით არ დამიკარგავს არაფერი. 7ზე რომ გავსულიყავი მაინც ზუსტად იგივე დროს მივიდოდი საცობების გადამკიდე. ყაზბეგზე მანქანის გასაჩერებელიც საკმაოდ ადვილად მოვძებნე და ძალიან ბედნიერმა მივაშურე დანიშნულების ადგილს, რომელმაც სულ ცოტა ხანში სრულიად იმედგაცრუებული დამტოვა.

გოგოები უკვე დიდი ხნის ხნის მისულები იყვნენ და პელმენებსაც მიირთმევდნენ. თუმცა მიირთმევდნენ სწორი ცნება არაა იმისა თუ რა სიტუაცია დამხვდა. როგორც აღმოჩნდა მცდელობა ქონდათ დაეგემოვნებინათ საშინლად უგემური პელმენი ქოთანში.

მეც იგივე შეცდომა რომ არ გამემეორებინა ჩემი აზრით ჭკუა ვიხმარე და შევუკვეთე ღუმელში გამომცხვარი სენდვიჩი ლორით და ყველით. თუმცა ამ ჩემმა არჩევანმა ყველაფერს გადააჭარბა და არათუ უგემური იყო არამედ საერთოდ არ გავდა სენდვიჩს. ყოველ შემთხვევაში იმას რაც ჩემი აზრით სენდვიჩია. ეხლა ძალიან ვნანობ რომ ფოტოაპარატი არ მქონდა და ეს ბუნების საოცრება არ გადავიღე. მომავალში ამ შედცომას არ გავიმეორებ.

სენდვიჩის კრახის შემდეგ კი ნამდვილად ჭკვიანურად მოვიქეცი და არაფერი აღარ შემიკვეთია, ჩემი მეგობრებისაგან განსხვავებით, რომლებმაც გათქვეფილი მარგარინის მსგავსი გემოს მქონე ეგრეთ წოდებული ტირამისუ და ბლინი ნაყინით დააგემოვნეს. ბლინის შიგთავსი ნაყინი მოტანისას უკვე იმდენად გამდნარი იყო რომ 3 წუთში გამდნარ კარაქს მოგაგონებდათ. ასევე აღსანიშნავია ბლინზე და მის თეფშზე მოსხმული გაურკვეველი წარმოშობის მწვანე ჟელესმაგვარი სითზე, რომელმაც მარსიანული წარმოშობის ჭურჭლის ჟელეს სახელი დაიმსახურა.

მოკლედ მგონი მეტის დაწერას აზრიც აღარ აქვს. ბოლოს სიცივისგან შეწუხებულებიც გამოვედით და იმაზეც დავფიქრდით, რომ ჯობდა სახლში დედების მომზადებული გემრიელი ვახშამი მიგვერთმია.

P.S. ამ ყველაფერთან ერთად შეგიძლიათ ეისიდ ბარის მრავლისმეტყველი საიტი მოინახულოთ, რომელიც ეხლახანს აღმოვაჩინე http://www.acidbar.com/ ან ეს http://www.kala.ge/acid3e.html

fragrancex.com vs strawberrynet.com

baiateo — Sat, 08 Jan 2011 11:29:39 GMT

პარფიუმერიის შესაძენად ორ საიტს ვიყენებ ხოლმე. ორივეს თავისი პლუს-მინუსი გააჩნია რასაც ეხლა გაგაცნობთ.

fragrancex.com

თუ სუნამოების შეძენა გსურთ მაშინ უმჯობესია fragrancex.com-ს მიმართოთ. ეს ერთერთი უიაფესი საიტია, სადაც შეგიძლიათ შეიძინოთ როგორც სუნამოები ისე დეკორატიული კოსმეტიკა და კანის მოვლის საშუალებები.

იმ შემთხვევაში თუ არსად არ გეჩქარებათ შეგიძლიათ გამოიყენოთ უფასო ტრანსპორტირების შემოთავაზება (შეკვეთის დროს უნდა ჩაწეროთ შემოთავაზების კოდი FREE) და სრულიად უფასოდ მიიღოთ თქვენთვის სასურველი სუნამო. თუმცა ამ მეთოდით ტრანსპორტირება დიდ დროს მოითხოვს, 1-1.5 თვემდე. ჩამოდის ჩვეულებრივ ფოსტაში და ამანათს თქვენ უნდა მიაკითხოთ მას შემდეგ რაც სახლში მოგივათ უწყება.

თუ თქვენ სარგებლობთ ფასდაკლების სხვა კოდით (მაგალითად ეხლა შეგიძლიათ 10%-იანი ფასდაკლების მიღება კოდით TAKE10) უფასო ტრანსპორტირების შემოთავაზებას ვეღარ გამოიყენებთ. ამ შემთხვევაში ტრანსპორტირების საფასური იქნება 9.95$+0.99$ყოველი ნივთისათვის.

ექსპრეს ფოსტით გზავნის სერვისი საქართველოში ამ საიტს არ გააჩნია, ყოველ შემთხვევაში ამჟამად აღარ გვთავაზობენ.

თუ თქვენ არჩევთ გადამზიდით სარგებლობას. მაშინ საინტერესო ინფორმაცია იქნება ალბათ, რომ 59$-დან ზევით საიტი გვთავაზობს უფასო გზავნას ამერიკაში. 59$-მდე კი 5.95$. თუმცა სუნამოები გადამზიდების უმეტესობას არ ჩამოაქვს. ჩემთვის ცნობილი გადამზიდი რომელსაც უპრობლემოდ ჩამოაქვს სუნამოები არის shopzilla.

Strawberrynet.com

ეს საიტიც წინას მსგავსად გვთავაზობს სხვადასხვა სახის პროდუქციას, როგორიცაა სუნამოები, დეკორატიული კოსმეტიკა და კანის მოვლის საშუალებები. თუმცა დეკორატიული კოსმეტიკის შეძენისას ამ საიტს ვარჩევ ხოლმე რამდენიმე მიზეზის გამო.

ერთიდაიგივე ნივთს ორივე საიტზე ერთიდაიგივე ფასი აქვს. მაგრამ ამ საიტზე მოქმედებს დამატებითი ფასდაკლების სისტემები, რომელთა საშუალებითაც გაცილებით იაფად შეისყიდით სასურველ ნივთს.

1. ყოველი მომდევნო შეკვეთისას ღებულობთ ზრდად ფასდაკლებას. მაგალითად: მეორე შესყიდვისას 1%, 3-2%, 4-3%, 5-4%, 6-დან 9 შეკვეთის ჩათვლით-5%, 10დან 19 შეკვეთის ჩათვლით - 7.5%, ხოლო 20 შეკვეთიდან ზევით - 10%

2. თუ თქვენ ყიდულობთ 2 ნივთს სისტემა აკეთებს ფასდაკლებას 1%, 3 ნივთის შეძენის შემთხვევაში 2%, 4 ნივთზე - 3%, 5 ნივთის შეძენისას - 4%, ხოლო 6 ან მეტ ნივთზე 5%.

3. მას შედეგ რაც გააკეთებთ პირველ შეკვეთას საიტი პერიოდულად გიგზავნით ფასდაკლების შემოთავაზებებს. მე პირადად მოსვლია 13, 17 და 20%იანი ფასდაკლების შეოთავაზებები. ბოლო 20%იანით ვისარგებლე კიდეც და ეხლა ველოდები ტონალურს და თვალის ფანქარს.

რაც ყველაზე მთავარია, ყველა ეს შემოთავაზება მუშაობს ერთდროულად. პლუს უფასო ტრანსპორტირება, ოღონდ ისევ და ისევ ჩვეულებრიი ფოსტით, რაც დიდ დროს მოითხოვს. თუმცა მიუხედავად დიდი დროისა ყოველთვის ამ მეთოდს ვიყენებ და მაქსიმუმ 1.5 თვეში ჩამომდის ნაყიდი ნივთები.

იმედი მაქვს დღევანდელი პოსტი დაგეხმარებათ არჩევანის გაკეთებაში.

Internetcalls VS Skype

baiateo — Sun, 02 Jan 2011 13:25:49 GMT

ეხლა ვათვალიერებდი answers.ge-ს და სურვილი გამიჩნდა ერთერთ კითხვაზე გამეცა პასუხი მაგრამ საბოლოოდ ამ პოსტის გაკეთება გადავწყვიტე.

როგორ შეიძლება იაფად დარეკვა საზღვარგარეთ?

ვერ ვიტყვი რომ ინტერნეტით დარეკვის ეს ორი გზა არსებობს მხოლოდ, მაგრამ ალბათ ყველაზე მოხერხებული პროგრამებია internetcalls და skype.

ამ ორი პროგრამიდან უფრო პოპულარული სკაიპია, თუმცა ორივეს აქვს თავისი დადებითი და უარყოფითი.

მე პირადად internetcalls-ს ვანიჭებ უპირატესობას. ამის მიზეზია სკაიპთან შედარებით დაბალი ტარიფები, რიგ ქვეყნებში კი ქალაქის ტელეფონზე უფასოდ დარეკვის შესაძლებლობა. მაგალითად თუ თქვენს ანგარიშზე დადებთ გარკვეულ თანხას (მინიმალური თანხა არაა განსაზღვრული) შესაძლებლობა გექნებათ internetcalls-ის საშუალებით 120 დღის განმალობაში უფასოდ ილაპარაკოთ არგენტინის, ავსტრალიის, ავსტრიის, ბელგიის, დანიის, საფრანგეთის, გერმანიის, ირლანდიის, იტალიის, იაპონიის, ლუქსემბურგის, ჰოლანდიის, ნორვეგიის, პოლონეთის, რუსეთის (მხოლოდ პეტერბურგის), სინგაპურის, სამხრეთ კორეის, ესპანეთის, შვედეთის, შვეიცარიის, ტაივანის, დიდი ბრიტანეთის საქალაქო ტელეფონებზე. ხოლო კანადის, აშშ-ს და ჰონგ-კონგის როგორც საქალაქო, ისე მობილურ ტელეფონებზე. 120 დღის გასვლის შემდეგ თქვენ ისარგებლებთ სტანდარტული ტარიფით, რომელიც სკაიპის ტარიფებზე მაინც ნაკლებია ან შეგიძლიათ ისევ დაიმატოთ თანხა ანგარიშზე და მომდევნო 120 დღის ათვლა დაიწყება.

თანხა რომელიც დადეთ თქვენს ანგარიშზე შეგიძლიათ უფასო დღეების განმალობაში გამოიყენოთ იმ ქვეყნებში დასარეკათ რომლებსაც უფასო შემოთავაზება არ გააჩნია, ან გამოიყენოთ უფასო დღეების გასვლის შემდეგ თქვენთვის სასურველ ქვეყანაში დასარეკად.

სურვილის შემთხვევაში internetcalls-ით შესაძლებელია ტექსტური შეტყობინების (sms) გაგზავნაც და მისი ტარიფებიც საკმაოდ დაბალია.

ყურსასმენების არქონის შემთხვევაში შესაძლებელია დასარეკად სახლის ან მობლური ტელეფონის გამოყენებაც. მაგრამ ეს დამატებით ხარჯთანაა დაკავშირებული რადგანაც თქვენს ტელეფონზე დარეკვის ხარჯიც დაგემატებათ და შესაძლებელია თქვენი მცდელობა არაეკონომიური გამოვიდეს.

მიუხედავად ამ ყველაფრისა სკაიპს გააჩნია ის რაც ამ პროგრამას არ გააჩნია. ესაა ონლაინში მყოფ კონტაქტთან უფასოდ დარეკვა ნებისმიერ ქვეყანაში. თუმცა ამ ფუნქციაზე ისედაც გეცოდინებათ და მის აღწერას აზრი არ აქვს.

პოსტს თან ვურთავ პროგრამის დიზანის გამოსახულებას. ამასთან მინდა აღვნიშნო, რომ დიზაინი საკმაოდ მარტივი და ადვილად გამოსაყენებელია.

როგორ დავჯავშნოთ სასტუმრო

baiateo — Fri, 31 Dec 2010 21:08:48 GMT

ორი წლის მანძილზე საკმაოდ ბევრჯერ მომიწია დამეჯავშნა სასტუმრო ჩემთვის თუ სხვისთვის. თბილისის ფორუმზე შემინიშნავს კითხვები ამ საკითხთან დაკავშირებით და ნაცნობებსაც არაერთხელ მოუმართავთ თხოვნით მეპოვა და დამეჯავშნა მათთვის სასტუმრო. აქედან გამომდინარე ვფიქრობ უადგილო არ უნდა იყოს პოსტი ამ თემაზე.

პირველ რიგში ვათვალიერებთ სპეციალურ საძიებო საიტებს.

მე პირადად უპირატესობას ვანიჭებ www.booking.com-ს. ამის ერთერთი მიზეზია ის, რომ ამ საიტიდან სასტუმროს დაჯავშნისას ბარათზე არ იბლოკება თანხა, თუმცა ზოგიერთი სასტუმრო მაინც ითხოვს ბარათზე თანხის არსებობას.

ebookers.com expedia.com - ამ საიტებიდან შესაძლებელია არა მხოლოდ სასტუმროს დაბრონვა, არამედ თვითმფრინავის ბილეთის შესყიდვაც და მანქანის დაქირავებაც, და არჩევანიც მშვენიერია, თუმცა ამ საიტების ნაკლი მდგომარეობს იმაში, რომ დაჯავშნისას აუცილებელია ბარათზე გქონდეთ შესაბამისი თანხა.

გარდა ამ საიტებისა მარტივი გამოსავალია გუგლის საძიებო სისტემის გამოყენება. მაგალითად ჩემი უფროსი ძიებას ყოველთვის იწყებს ამ ფრაზით "cheap hotels in .....". თუმცა მე ამ მეთოდს ნაკლებად ვიყენებ ხოლმე, რათა თავიდან ავიცილო გაუგებარ საიტებზე ბარათის გამოყენება და შემდგომში შესაძლო პრობლემები.

ამ ან სხვა მსგავსი საიტებიდან სასტუმროს დაჯავშნისას თქვენს მიერ მითითებულ ელექტრონულ ფოსტაზე მოგივათ ჯავშნის დადასტურება, თუმცა ზოგიერთი საიტი სასტუმროს დაჯავშნისას არ ახდენს ჯავშნის მომენტალურ დადასტურებას. ამიტომაც ყურადღებით გაეცანით საიტის პირობებს, რადგანაც ყოფილა შემთხვევა როდესაც იმის გამო, რომ მომენტალურად არ მოვიდა დადასტურება საბოლოო შედეგი აღმოჩნდა 8 დაბრონილი სასტუმრო და დაბლოკილი თანხები:)

გარდა ამ საიტებისა სასტურო შეიძლება დაიბრონოს თვით ამ სასტუმროს საიტიდანაც, თუმცა აღსანიშნავია, რომ ძირითადად მათ საიტებზე გაცილებით მაღალი ფასებია მითითებული.

კიდევ ერთი მეთოდი რასაც მივმართავ ხოლმე ესაა "Google earth". თუ კომპიუტერში დაყენებული გაქვთ ეს პროგრამა შეგიძლიათ შეხედოთ თქვენი დანიშნულების ადგილს, რადგანაც ხშირად საკმაოდ საინტერესო შემოთავაზებების მქონე სასტუმროებია დატანილი. მაგალითად თებერვალში ზუსტად ასე ვიპოვე ერთი უმშვენიერესი სასტუმრო.

იმ შემთხვევაში, თუ არ გაქვთ საბანკო ბარათი, მოცემულ მომენტში არ გაგაჩნიათ მასზე თანხა ან რაიმე მიზეზის გამო არ გსურთ მისი გამოყენება, საუკეთესო ვარიანტია სასტუმროს საკონტაქტო ინფორმაციის მოძიება გუგლის საშუალებით და პირდაპირ დაკავშირება ტელეფონის ან ელ-ფოსტის საშუალებით. (დიდი სატელეფონო ხარჯების თავიდან ასაცილებლად გირჩევთ internetcalls-ის გამოყენებას, ეს საკმაოდ მოსახერხებელი და იაფი პროგრამაა, რომლის საშუალებითაც ზოგიერთ ქვეყანაში უფასოდაც კი შეიძლება დარეკვა. მაგ: გერმანიაში ქალაქის ტელეფონზე, კანადაში როგორც ქალაქის ასევე მობილურ ტელეფონზე). რა თქმა უნდა ვერ ვიტყვი, რომ პირდაპირი დაკავშირებისას ყოველთვის შესაძლებელია უბარათოდ დაჯავშნა, თუმცა ხშირად ეს მეთოდი უპრობლემოდ ამართლებს, ხანდახან კი ფასის მომატების ხარჯზე. მაგალითისათვის ოქტომბერში ამ მეთოდმა სრულიად გაამართლა იაპონიაში, საშინლად გადატვირთული სასტუმროების ფონზეც კი. ასე, რომ ცდა ღირს.

რაც შეეხება სასტუმროს არჩევას, ამ საკითხში ალბათ ნაკლებად შევძლებ რჩევის მოცემას, რადგანაც ყველას თავისი გემოვნება აქვს და ფინანსური შესაძლებლობებიც განსხვავებული, მთავარია ფასისა და ხარისხის საუკეთესო შეთანხმება იპოვოთ. შეხედეთ რუკასაც, რომ სიურპრიზი არ დაგხვდეთ და გარეუბანში ან თუ საქმიან შეხვედრაზე მიდიხართ შეხვედრის ადგილიდან ძალიან შორს არ აღმოჩნდეთ. ასევე ერთი უცნაური რჩევა, სასტუმროს ფოტოების დათვალიერებისას აუცილებლად დააკვირდით დროშების არსებობას, განსაკუთრებით გაურკვეველი წარმომავლობის ჭრელა-ჭრულა დროშებს. ასეთის არსებობის შემთხვევაში, რაც არ უნდა კარგი ფასი ქონდეს სასტუმროს ჩემი პირადი რჩევაა თავი დაანებოთ მას, რათა რაიმე გაუგებრობაში არ ამოყოთ თავი :)) გარდა ამისა ყურადღებით წაიკითხეთ მომხმარებლების მიერ დატოვებული მიმოხილვები.

თუ გამოუვალ მდგომარეობაში ხართ შესაძლებელია მიმართოთ ტურისტულ სააგენტოსაც, თუმცა პირადი გამოცდილებით შემიძლია გითხრათ, რომ ამ შემთხვევაში გაცილებით ძვირი დაგიჯდებათ სასტუმროს დაჯავშნა მსოფლიოს ნებისმიერი ქვეყნისათვის, გარდა ეგვიპტისა, ეგვიპტე სულ სხვა საკითხია.

ალბათ სულ ესაა

ამასობაში კი კიდევ ერთი საიტი გამახსენდა, რომელსაც ვენდობი agoda.com. თუმცა ისევ და ისევ ბარათზე თანხა უნდა გქონდეთ ამ საიტით სასტუმროს დასაჯავშნად

წარმატებებს გისურვებთ

Latte.ge

baiateo — Thu, 30 Dec 2010 19:21:01 GMT

საღამო მშვიდობისა,

დღეს მთელი დღე ვფიქრობდი დამეწერა თუ არა პირველი ქართული პოსტი. რამდენიმე ინგლისურენოვანი უკვე მაქვს მაგრამ ქართულს რატომღაც ვერიდებოდი და კაი ხანი არც ვაპირებდი.

ჩემს შესახებ რაიმეს დაწერას ალბათ აზრი არ აქვს, დროთა განმალობაში ისედაც გამოჩნდება. ეხლა კი მინდა მოგიყვეთ თუ რამ მაიძულა დღევანდელი პოსტი გამეკეთებინა.

მთელი დღის მოლაპარაკებებისა და მრავალი ვარიანტის განხილვის შემდეგ დაქალებმა გადავწყვიტეთ წავსულიყავით ფალიაშვილის 55-ში, ყავის სახლში "Latte". მართალია მთელი დღე მწვადისმაგვარ საჭმელზე ვოცნებობდი მაინც დავთანხმდი, იმის გათვალისწინებითაც, რომ ერთ დროს ძალიან მომწონდა ეს ადგილი.

სამსახურში არც ისე ბევრი საქმე მქონდა და ამიტომაც წასვლის წინ ვებ-გვერდიც მოვიძიე. მინდა აღვნიშნო, რომ საკმაოდ სასიამოვნო დიზაინის და ინფორმატიული საიტია. რაც ყველაზე მნიშვნელოვანია მენიუც მოიპოვება.

საიტზე ორი შემოთავაზება მომეჩვენა საინტერესოდ: ყავა წასაღებად და ლანჩი ლატეში, რომელიც თუ სწორი ინფორმაცია დევს ერთ ადამიანზე 10 ლარი ღირს, ხოლო ორისათვის კი 15. თუმცა საიტს იქით ჩემი ინტერესი არ წასულა, რადგანაც ორთაჭალიდან ვაკეში ყავის წასაღებად და ლანჩისთვის სიარულს აზრი არ აქვს, მით უმეტეს დაძაბული სამუშაო დღის პირობებში, მაგრამ ვინც ახლოს მუშაობს ჩემი აზრით მშვენიერი შეთავაზებაა.

სამწუხაროდ სამსახურიდან დანიშნულების ადგილამდე მისვლა საკმაოდ გამიჭირდა გზაზე წარმოქმნილი საცობების გამო, თუმცა ეს ლატეს ბრალი არანაირად არაა:) თუ 7 საათამდე მიხვალთ დარწმუნებული ვარ მანქანის გასაჩერებელი ადგილის ნაკლებობასაც იგრძნობთ, უბრალოდ ამ შემთხვევაში გამიმართლა და ზუსტად შესასვლელთან გავაჩერე მანქანა.

ეხლა კი ის რის გამოც გადავწყვიტე დღეს დამეწერა - თვითონ "ლატე". ყავა ამჯერად არ დამილევია, მაგრამ წინა გამოცდილებიდან გამომდინარე ნამდვილად ვიცი, რომ არა მხოლოდ ლამაზად გაფორმებული არამედ ძალიან გემრიელიცაა. გუშინ კი იმაშიც დავრწუნდი, რომ საჭმელებსაც ძალიან გემრიელს ამზადებენ. ყოველ შემთხვევაში სენდვიჩი, პელმენი ქოთანში და მექსიკური კარტოფილი მშვენიერი იყო.

ყავის მსგავსად ინტერიერიც ძალიან ლამაზად გაფორმებულია და სასიამოვნო მუსიკაა ჩართული, თუმცა ეხლა ვერაფრით ვერ ვიხსენებ რა სტილის :)

მომსახურე პერსონალს რაც შეეხება, მთელი იქ ყოფნის პერიოდი ვფიქრობდი რომ არ მომეწონა, მაგრამ ნამდვილად ვერაფერს დავუწუნებ, ძალიან მონდომებულები არიან.

ერთადერთი უარყოფითი რაც შემიძლია დავწერო, ლატეში ყოფნის ბოლოს შევამჩნიე. ყავის აპარატი, რომელიც იქვე სალონში დგას საშინელ ხმას გამოსცემს და საოცარ დისკომფორტს ქმნის. თუმცა ამ დისკომფორტს თავისუფლად ფარავს სხვა პლუსები.

მოკლედ რომ ვთქვა, საკმაოდ სასიამოვნო ადგილია, სადაც შესაძლებელია ადამიანმა მშვიდად დალიოს ყავა, მიირთვას გემრიელი ნამცხვრები და ელ-ფოსტაც შეამოწმოს თუ რა თქმა უნდა ლეპტოპითაა მისული.

დღეისათვის მგონი დავამთავრე.

იმედი მაქვს თქვენს აზრსაც გამიზიარებთ თუ რა თქმა უნდა მოხვდებით ლატეში.